اگر بیرون ملک حملے کیے گئے تو وہ جہاد نہیں جنگ ہو گی، افغان وزیرِ دفاع

(ڈیلی اردو نیوز نیٹ ورک)
افغان وزیرِ دفاع محمد یعقوب مجاہد نے سپریم لیڈر ہیبت اللّٰہ اخوندزادہ کی جانب سے طالبان کو پیغام دیتے ہوئے کہا ہے کہ اگر بیرون ملک حملے کیے گئے تو وہ جہاد نہیں بلکہ جنگ ہو گی۔

غیر ملکی خبر رساں ایجنسی کے مطابق افغانستان کے وزیر دفاع محمد یعقوب مجاہد نے سرکاری ٹیلی ویژن سے نشر ہونے والی افغان سیکیورٹی فورسز کے ارکان سے ایک تقریر میں کہا کہ افغانستان سے باہر لڑائی مذہبی طور پر منظور شدہ جہاد نہیں، بلکہ جنگ ہے، جسے سپریم لیڈر ہیبت اللّٰہ اخوندزادہ نے روک دیا ہے۔

محمد یعقوب مجاہد کے مطابق سپریم لیڈر نے کہا کہ اگر کوئی جہاد کے مقصد کے لیے افغانستان سے باہر جاتا ہے تو اسے جہاد نہیں کہا جائے گا ۔

انہوں نے کہا کہ اگر امیر مجاہدین جنگجوؤں کو جنگ میں جانے سے روکتے ہیں اور وہ پھر بھی ایسا کرتے ہیں تو یہ جنگ ہے، جہاد نہیں۔